Кадравая работа

Кадравая палітыка Міністэрства юстыцыі Рэспублікі Беларусь у першую чаргу накіравана на фарміраванне кадравага саставу, здольнага вынікова выконваць пастаўленыя перад органамі і арганізацыямі сістэмы юстыцыі задачы, і эфектыўнае выкарыстанне кадравага патэнцыялу работнікаў.

Кадравы састаў Міністэрства юстыцыі фарміруецца як з вопытных, высокапрафесійных работнікаў, так і з маладых спецыялістаў. Нязменна доля моладзі ў кадравым саставе цэнтральнага апарату Міністэрства юстыцыі складае каля 25%, у кадравым саставе тэрытарыяльных органаў прымусовага выканання – каля  50%.

Асноўнымі задачамі работы з кадрамі ў Міністэрстве юстыцыі з'яўляюцца:

  • падбор і расстаноўка кадраў з улікам прафесійных, дзелавых і асабістых якасцей;

  • развіццё кадравага патэнцыялу работнікаў;

  • арганізацыя работы з кадрамі з улікам фарміравання сучасных патрабаванняў да кадраў розных узроўняў кіравання;

  • ўкараненне сучасных кадравых тэхналогій, удасканаленне форм і метадаў ацэнкі дзейнасці кадраў;

  • фарміраванне дзейснага рэзерву кадраў, перспектыўнага кадравага рэзерву з ліку моладзі і арганізацыя планамернай працы з ім;

  • матывацыя эфектыўнай працы, рацыянальнае выкарыстанне чалавечых рэсурсаў, стварэнне спрыяльных умоў для працы і прафесійнага росту, фарміраванне эфектыўнай сістэмы матэрыяльнага і маральнага стымулявання работнікаў;

  • удасканаленне бесперапыннай сістэмы падрыхтоўкі, павышэння кваліфікацыі, стажыроўкі і перападрыхтоўкі кадраў;

  • планаванне і арганізацыя самаадукацыі асоб, уключаных у рэзервы кадраў;

  • удасканаленне ідэалагічнай работы;

  • фарміраванне ў работнікаў нецярпімых адносін да карупцыйных праяўленняў;

  • падтрыманне здаровага маральна-псіхалагічнага клімату ў працоўных калектывах, умацаванне працоўнай і выканальніцкай дысцыпліны, недапушчальнасць адтоку высокакваліфікаваных работнікаў, якія валодаюць адпаведным прафесійным узроўнем;

  • забеспячэнне належных умоў і аховы працы.

Міністэрствам юстыцыі распрацаваны два праграмныя дакументы, якія вызначаюць асноўныя напрамкі кадравай палітыкі і шляхі дасягнення пастаўленых мэт, – Праграма па ўдасканаленні кадравага забеспячэння Міністэрства юстыцыі Рэспублікі Беларусь на 2018 - 2025 гады і Праграма па ўдасканаленні кадравага забеспячэння органаў прымусовага выканання.

Мэтамі гэтых праграм з'яўляюцца распрацоўка і ўкараненне ў работу агульнага комплексу прынцыпаў, формаў, метадаў і сродкаў, якія забяспечваюць удасканаленне сістэмы кіравання кадравым патэнцыялам Міністэрства юстыцыі, органаў, арганізацый, якія ўваходзяць у сістэму міністэрства, тэрытарыяльных органаў прымусовага выканання, павышэнне эфектыўнасці падбору, расстаноўкі, кар'ернага росту прафесійна падрыхтаваных і ініцыятыўных кіраўнікоў і спецыялістаў.

Вялікая ўвага пры рабоце з кадрамі надаецца Міністэрствам юстыцыі арганізацыі пераемнасці кадраў і падбору кандыдатаў у рэзерв кадраў.

Парадак работы з рэзервам кадраў у Міністэрстве юстыцыі вызначаны Інструкцыяй аб арганізацыі работы з кадрамі ў цэнтральным апараце Міністэрства юстыцыі Рэспублікі Беларусь, органах, арганізацыях сістэмы Міністэрства юстыцыі Рэспублікі Беларусь, зацверджанай пастановай Міністэрства юстыцыі Рэспублікі Беларусь ад 8 красавіка 2005 года № 15.

Работа з рэзервам кадраў ўключае яго фарміраванне і кантроль за станам, падрыхтоўку залічаных ў рэзерв работнікаў і забеспячэнне іх кар'ернага росту. Рэзерв кадраў пераглядаецца штогод да 1 красавіка.

Асноўнымі крытэрыямі залічэння кандыдата ў рэзерв кадраў з'яўляюцца:

  • вынікі яго практычнай дзейнасці на займаемай пасадзе, паказчыкі працоўнай і выканальніцкай дысцыпліны;

  • дзелавыя і асабістыя якасці кандыдата, яго здольнасці, патэнцыяльныя магчымасці;

  • вынікі тэсціравання і апошняй атэстацыі кандыдата;

  • водгукі асоб, якія непасрэдна працуюць з кандыдатам;

  • ўзрост і стан здароўя кандыдата.

Пры гэтым Міністэрствам юстыцыі на пастаяннай аснове ажыццяўляецца фарміраванне спісу кандыдатаў на замяшчэнне пасад у цэнтральным апараце Міністэрства юстыцыі, у тым ліку для ўключэння іх у рэзерв кадраў.

Прававы статус работнікаў Міністэрства юстыцыі, якія з'яўляюцца дзяржаўнымі служачымі, вызначаецца законамі Рэспублікі Беларусь «Аб дзяржаўнай службе ў Рэспубліцы Беларусь», «Аб барацьбе з карупцыяй», а таксама іншымі нарматыўнымі прававымі актамі.

Агульнымі патрабаваннямі, што прад'яўляюцца да кандыдатаў на працу ў Міністэрства юстыцыі, з'яўляюцца:

  • грамадзянства Рэспублікі Беларусь;

  • валоданне дзяржаўнымі мовамі Рэспублікі Беларусь;

  • адсутнасць судзімасці;

  • вышэйшая юрыдычная адукацыя;

  • стаж работы па спецыяльнасці;

  • веданне Канстытуцыі Рэспублікі Беларусь, законаў у прымяненнi да выканання адпаведных службовых абавязкаў.

Для асоб, якія ўпершыню паступаюць на дзяржаўную службу, праводзіцца кваліфікацыйны экзамен у парадку, устаноўленым Указам Прэзідэнта Рэспублікі Беларусь ад 17 сакавіка 2005 г. № 139 «Аб зацвярджэнні Палажэння аб кваліфікацыйным экзамене для асоб, якія ўпершыню паступаюць на дзяржаўную службу».

Вялікае значэнне надаецца Міністэрствам юстыцыі падрыхтоўцы юрыдычных кадраў, авалоданню студэнтамі практычнымі навыкамі і іх падрыхтоўцы да самастойнай прафесійнай дзейнасці па юрыдычнай спецыяльнасці і супрацоўніцтву з навучальнымі ўстановамі рэспублікі па гэтых пытаннях.

Міністэрствам юстыцыі заключаны дагаворы аб арганізацыі практыкі студэнтаў з Акадэміяй кіравання пры Прэзідэнце Рэспублікі Беларусь, Беларускім дзяржаўным універсітэтам, Беларускім дзяржаўным эканамічным універсітэтам, ПУА «БІП-Інстытут правазнаўства», УА ФПБ «Міжнародны універсітэт «МІТСА», Юрыдычным каледжам БДУ і іншымі ўстановамі адукацыі.

Штогод у Міністэрстве юстыцыі праходзяць практыку студэнты ўказаных устаноў адукацыi, лепшыя з якіх па выніках праходжання практыкі ўключаюцца ў рэзерв кадраў Міністэрства юстыцыі. На сённяшні дзень у Міністэрстве юстыцыі на розных пасадах працуюць 10 былых студэнтаў, якія праходзілі практыку ў Міністэрстве юстыцыі.

У мэтах паскарэння працэсу прафесійнага станаўлення маладых спецыялістаў, асоб, якія ўпершыню паступілі на дзяржаўную службу,  набыцця імі неабходных прафесійных ведаў, уменняў і навыкаў, хутчэйшай адаптацыі ў калектыве ў практыку работы з кадрамі ў Міністэрстве юстыцыі ўкаранёна настаўніцтва. У ходзе настаўніцтва работнік пад кіраўніцтвам і пры падтрымцы прызначанага настаўніка знаёміцца ​​з арганізацыяй кіраўніцкай дзейнасці ўнутры міністэрства і адпаведнага структурнага падраздзялення, пытаннямі ўзаемадзеяння з іншымі структурнымі падраздзяленнямі, лакальнымі прававымі актамі міністэрства, праграмнымі прадуктамі, што выкарыстоўваюцца па службе, з практыкай работы адпаведнага структурнага падраздзялення, вывучае тэарэтычныя пытанні, якія датычацца выканання службовых абавязкаў.

 Павышэнне прафесійнага ўзроўню работнікаў арганізавана ў Акадэміі кіравання пры Прэзідэнце Рэспублікі Беларусь, Беларускім дзяржаўным універсітэце, іншых установах адукацыі рэспублікі. Акрамя таго, работнікі Міністэрства юстыцыі прымаюць удзел у навучальных семінарах, канферэнцыях, лекцыях, у тым ліку за мяжой.

Міністэрствам юстыцыі на пастаяннай аснове праводзяцца мерапрыемствы ідэалагічнай накіраванасці – акцыі, прымеркаваныя да дзяржаўных святаў і святочных дзён, падчас якіх ажыццяўляецца бясплатнае кансультаванне грамадзян па юрыдычных пытаннях, а таксама конкурсы на званне лепшых па прафесіі, суботнікі, акцыі, прымеркаваныя да падзеяў сацыяльна-эканамічнага жыцця краіны, спартыўныя спаборніцтвы. Правядзенне гэтых мерапрыемстваў дапамагае стварэнню спрыяльнага мікраклімату ў працоўным калектыве, выхаванню пачуцця адказнасці і дысцыпліны ў кожнага работніка, павышэнню грамадзянскай правасвядомасці работнікаў, стымуляванню актыўнага ўдзелу ў грамадскім жыцці.

уверх