Праверкі нарматворчых органаў па пытаннях нарматворчай дзейнасці

Правядзенне праверак выканання ўстаноўленага парадку падрыхтоўкі, прыняцця (выдання), уліку, накіравання на абавязковую юрыдычную экспертызу нарматыўных прававых актаў, правамернасці прымянення нарматыўных прававых актаў, якія не прайшлі абавязковую юрыдычную экспертызу (далей – праверкі), рэгламентуецца Указам Прэзідэнта Рэспублікі Беларусь ад 30 снежня 2010 г . № 711 «Аб некаторых пытаннях ажыццяўлення абавязковай юрыдычнай экспертызы нарматыўных прававых актаў» і пастановай Савета Міністраў Рэспублікі Беларусь ад 23 верасня 2006 года № 1244 «Аб абавязковай юрыдычнай экспертызе нарматыўных прававых актаў».

Згодна з падпунктам 2.4 пункта 2 пастановы Савета Міністраў Рэспублікі Беларусь ад 23 верасня 2006 года № 1244 праверкі праводзяць:

  • Міністэрства юстыцыі – у дачыненні да нарматыўных прававых актаў Нацыянальнага банка, Камітэта дзяржаўнага кантролю, Кіраўніцтва справамі Прэзідэнта Рэспублікі Беларусь, Следчага камітэта, Дзяржаўнага камітэта судовых экспертыз, Нацыянальнай акадэміі навук Беларусі, міністэрстваў, іншых рэспубліканскіх органаў дзяржаўнага кіравання, абласных, Мінскага гарадскога Саветаў дэпутатаў, аблвыканкамаў, Мінскага гарвыканкама;

  • галоўныя ўпраўленні юстыцыі аблвыканкамаў у межах адпаведных адміністрацыйна-тэрытарыяльных адзінак – у дачыненні да нарматыўных прававых актаў мясцовых Саветаў дэпутатаў, выканаўчых і распарадчых органаў базавага ўзроўню.

Праверкі праводзяцца на падставе планаў, якія штогод зацвярджаюцца не пазней за 15 студзеня каляндарнага года правядзення праверак.

У ходзе праверак ажыццяўляецца выбарачны аналіз нарматыўных прававых актаў нарматворчага органа, які падвергнуўся праверцы, за два гады, што папярэднічаюць году правядзення праверкі, ацэньваецца выкананне ім устаноўленага парадку падрыхтоўкі, прыняцця (выдання), уліку, накіравання на абавязковую юрыдычную экспертызу нарматыўных прававых актаў, правамернасць прымянення яго нарматыўных прававых актаў, якія не прайшлі абавязковую юрыдычную экспертызу.

Па выніках праверкі складаецца i накіроўваецца ў нарматворчы орган, які падвергнуўся праверцы, для азнаямлення і падпісання:

  • акт праверкі, калі ў ходзе праверкі выяўлены парушэнні заканадаўства;

  • даведка праверкі, калі ў ходзе праверкі не выяўлены парушэнні заканадаўства.

У выпадку нязгоды з высновамі, якія змяшчаюцца ў акце праверкі, нарматворчы орган, які падвергнуўся праверцы, мае права пісьмова выкласці свае пярэчанні і накіраваць іх на адрас Міністэрства юстыцыі або галоўнага ўпраўлення юстыцыі аблвыканкама.

Пры згодзе з высновамі, якія змяшчаюцца ў акце праверкі, нарматворчы орган, які падвергнуўся праверцы, мае права прыняць меры па ліквідацыі выяўленых парушэнняў і пісьмова паведаміць Міністэрству юстыцыі або галоўным ўпраўленням юстыцыі аблвыканкамаў з прыкладаннем дакументаў, якія пацвярджаюць іх ліквідацыю.

Пры прызнанні Міністэрствам юстыцыі або галоўным упраўленнем юстыцыі аблвыканкама прадстаўленых нарматворчым органам, які падвергнуўся праверцы, пярэчанняў па акту праверкі неабгрунтаванымі або калі выяўленыя парушэнні не былі ликвідаваны ім у тэрмін Міністэрства юстыцыі або галоўнае ўпраўленне юстыцыі аблвыканкама уносіць у адпаведны нарматворчы орган абавязковае для выканання прадстаўленне аб ліквідацыі дапушчаных парушэнняў.

У выпадку невыканання нарматворчым органам, які падвергнуўся праверцы, прадстаўлення па сканчэнні месячнага тэрміну з даты яго унясення інфармацыя аб выяўленых парушэннях нарматворчай дзейнасці накіроўваецца:

Міністэрствам юстыцыі:

  • у Адміністрацыю Прэзідэнта Рэспублікі Беларусь – у дачыненні да дзяржаўных органаў (арганізацый), падпарадкаваных (падсправаздачных) Прэзідэнту Рэспублікі Беларусь;

  • у Савет Міністраў Рэспублікі Беларусь – у дачыненні да міністэрстваў і іншых рэспубліканскіх органаў дзяржаўнага кіравання, падпарадкаваных Ураду Рэспублікі Беларусь;

  • у абласныя, Мінскі гарадскі Саветы дэпутатаў – у дачыненні да адпаведных аблвыканкамаў, Мінскага гарвыканкама, мясцовых Саветаў дэпутатаў базавага ўзроўню;

  • у аблвыканкамы – у дачыненні да мясцовых выканаўчых і распарадчых органаў базавага ўзроўню.

Галоўнымі ўпраўленнямі юстыцыі аблвыканкамаў:

  • у абласныя Саветы дэпутатаў – у дачыненні да мясцовых Саветаў дэпутатаў базавага ўзроўню;

  • у аблвыканкамы – у дачыненні да мясцовых выканаўчых і распарадчых органаў базавага ўзроўню.

уверх