Стартаваў рэспубліканскі конкурс творчых работ «Права на дзяцінства»

Міністэрства юстыцыі сумесна з Прадстаўніцтвам Дзіцячага фонду ААН (ЮНІСЕФ) запрашае дзяцей ва ўзросце да 18 гадоў да ўдзелу ў конкурсе творчых работ «Права на дзяцінства».

Правядзенне падобных конкурсаў, дзе дзеці і моладзь праз творчасць могуць данесці свой погляд на рэалізацыю правоў дзіцяці, для Міністэрства юстыцыі не ў навіну, і конкурс дзіцячага малюнка, які праводзіўся раней, стаў конкурсам творчых работ. Сёння дзеці з задавальненнем не толькі малююць, але і ствараюць анімацыю, здымаюць відэаролікі і нават вядуць свае YouTube-каналы.

Менавіта таму конкурс праводзіцца па трох намінацыях:

  • «Малюнак»;

  • «Анімацыя»;

  • «Відэаролік».

У адпаведнасці з Законам «Аб правах дзіцяці» дзеці валодаюць усімі магчымымі для дарослых правамі, але часова абмежаваныя ў рэалізацыі некаторых з іх. Разам з тым, дзеці маюць патрэбу ў асаблівым клопаце і падтрымцы з боку грамадства. З прычыны гэтага былі вылучаны наступныя тэмы для конкурсных работ:

  • правы дзіцяці;

  • сацыяльная абарона сям'і і дзяцей дзяржавай;

  • абарона правоў дзяцей-сірот і дзяцей, якія засталіся без апекі бацькоў;

  • правы дзяцей-інвалідаў;

  • абавязкі дзіцяці.

Конкурсныя работы прымаюцца да 1 чэрвеня 2020 года.

Малюнкі неабходна накіроўваць па пошце на адрас Міністэрства юстыцыі: 220004, г. Мінск, вул. Калектарная, 10, (прэс-служба), а вось работы ў намінацыях «Анімацыя», «Відэаролік» падаюцца дыстанцыйна і павінны быць размешчаны ў «воблаку» на серверы ў глабальнай камп’ютарнай сетцы Інтэрнэт і даступны для запампоўкі для прадстаўнікоў конкурснай камісіі.

Будзе арганізавана інтэрнэт-галасаванне ў намінацыях, карыстальнікі сацыяльных сетак «Вконтакте», «Facebook» і «Одноклассники» змогуць падтрымаць лепшыя работы сваімі галасамі.

Пераможцы ў намінацыях вызначаюцца з дапамогай сумы балаў у рамках інтэрнэт-галасавання  ў афіцыйных групах Міністэрства юстыцыі ў сацыяльных сетках і галасавання конкурснай камісіі.

Імёны пераможцаў будуць абвешчаны да 1 верасня 2020 года.

Пераможцы атрымаюць памятныя падарункі і дыпломы ад Міністэрства юстыцыі Рэспублікі Беларусь і Прадстаўніцтва Дзіцячага фонду ААН (ЮНІСЕФ).

Звяртаем увагу, што работы, дасланыя на конкурс, могуць быць у далейшым выкарыстаны ў наглядных друкаваных матэрыялах, якія выдаюцца Міністэрствам юстыцыі і Прадстаўніцтвам Дзіцячага фонду ААН (ЮНІСЕФ), і ў сацыяльных сетках.

уверх