Рэгіянальны семінар па імплементацыі міжнароднага гуманітарнага права праходзіць у Мінску

Міністр юстыцыі Рэспублікі Беларусь Алег Сліжэўскі, старшыня Камісіі па імплементацыі міжнароднага гуманітарнага права пры Савеце Міністраў Рэспублікі Беларусь, і Джорджэ Дрндарскі, кіраўнік Місіі Міжнароднага Камітэта Чырвонага Крыжа (МКЧК) у Рэспубліцы Беларусь, выступілі з вітальнай прамовай на адкрыцці Сёмага рэгіянальнага семінара па імплементацыі міжнароднага гуманітарнага права (МГП). Семінар праводзіцца сумесна Рэгіянальнай дэлегацыяй МКЧК у Расійскай Федэрацыі, Беларусі і Малдове і Міністэрствам юстыцыі Рэспублікі Беларусь.

Актуальныя выклікі ў сферы гуманітарнай дзейнасці, аднаўленне сямейных сувязяў, абарона культурных каштоўнасцяў у перыяд узброенага канфлікту, абарона персанальных дадзеных як сродак захавання правоў індывіда – гэтыя і многія іншыя пытанні будуць абмяркоўваць у Мінску ў перыяд з 29 па 31 кастрычніка 2019 года прадстаўнікі міністэрстваў юстыцыі, замежных спраў, абароны, культуры, аховы здароўя з Азербайджана, Арменіі, Беларусі, Кыргызстана, Малдовы, Расіі, Таджыкістана, Туркменістана, Узбекістана, Украіны, а таксама эксперты МКЧК, Арганізацыі Дамовы аб калектыўнай бяспецы, прадстаўнікі Міжпарламенцкай Асамблеі дзяржаў-удзельніц Садружнасці Незалежных Дзяржаў (СНД) і Сакратарыята Савета міністраў абароны дзяржаў-удзельніц СНД, прадстаўнікі акадэмічнай супольнасці.

Як падкрэсліў Алег Сліжэўскі, Рэспубліка Беларусь паслядоўна праводзіць палітыку міралюбівай дзяржавы, бяспечнага і надзейнага суседа, пасрэдніка ў вырашэнні спрэчак. У рамках работы Камісіі па імплементацыі міжнароднага гуманітарнага права пры Савеце Міністраў Рэспублікі Беларусь праводзіцца работа па забеспячэнню належнай імплементацыі нормаў міжнароднага гуманітарнага права, прававой асвеце і распаўсюджванню ведаў аб міжнародным гуманітарным праве.

У сваю чаргу Джорджэ Дрндарскі высока ацаніў ступень і выніковасць ўзаемадзеяння Міжнароднага Камітэта Чырвонага Крыжа і Міністэрства юстыцыі Рэспублікі Беларусь, надзейнасць  і стратэгічны змест сумесных мерапрыемстваў у сферы міжнароднага гуманітарнага права.

уверх