Сынам Айчыны, якія загінулі за яго межамі

15 лютага ў Дзень памяці воінаў-інтэрнацыяналістаў па ўсёй краіне праходзяць традыцыйныя мерапрыемствы, прымеркаваныя да чарговай гадавіны вываду савецкіх войскаў з Дэмакратычнай Рэспублікі Афганістан. 34 гады таму з Афганістана сышлі апошнія воінскія часці Абмежаванага кантынгенту Савецкай Арміі.

За тысячы кіламетраў ад Радзімы нашы воіны, праявіўшы гераічную стойкасць, мужнасць і самаахвярнасць, першымі кінулі выклік міжнароднаму тэрарызму. Змагаючыся з ворагам, шчыра верылі, што ад іх залежыць мірнае і шчаслівае жыццё брацкага народа.

Сёння з самай раніцы прадстаўнікі рэспубліканскіх органаў дзяржаўнага кіравання, грамадскіх аб'яднанняў, навучальных устаноў і прадпрыемстваў сталіцы пад гукі духавога аркестра павольнай чарадой падыходзілі да галоўнага мемарыяла на Востраве мужнасці і смутку, прысвечанага беларускім воінам-інтэрнацыяналістам.

Дэлегацыя Міністэрства юстыцыі, упраўлення прымусовага выканання галоўнага ўпраўлення юстыцыі Мінскага гарвыканкама прыняла ўдзел у мерапрыемстве, усклаўшы кветкі і вянок да помніка "Сынам Айчыны, якія загінулі за яго межамі".

Аддаючы даніну павагі ўсім, хто выжыў і вярнуўся дадому, мы падзяляем боль страты з тымі, хто страціў блізкіх таварышаў, не дачакаўся родных і блізкіх. Няхай светлая памяць аб іх назаўжды застанецца ў нашых сэрцах!

Жадаем усім воінам-інтэрнацыяналістам моцнага здароўя, мірнага неба, аптымізму, дабрабыту і ўдачы. Няхай ваша адзінства і згуртаванасць натхняюць вас на дасягненне новых мэт, стануць арыенцірам для далейшых здзяйсненняў і добрых спраў!