Робім права даступней

Рэспубліканская акцыя "Даступнае права" па бясплатным прававым кансультаванні шматдзетных сем'яў і сем'яў, якія выхоўваюць дзяцей-інвалідаў, прайшла сёння па ўсёй краіне. У акцыі прынялі ўдзел прадстаўнікі цэнтральнага апарата Міністэрства юстыцыі, галоўных упраўленняў юстыцыі аблвыканкамаў і Мінгарвыканкама, аддзелаў загса, натарыяльных бюро, натарыяльных кантор і юрыдычных кансультацый. Прыцягненне спецыялістаў рознага профілю дало магчымасць арганізаваць кансультаванне па шырокім спектры пытанняў: спадчыннага права, прымусовага выканання, дзяржаўнай рэгістрацыі і ліквідацыі суб'ектаў гаспадарання, дзейнасці дзяржаўных архіваў, органаў запісу актаў грамадзянскага стану.

У многіх рэгіёнах былі арганізаваны прамыя лініі для зручнасці грамадзян, якія не маюць магчымасці звярнуцца да спецыялістаў асабіста. Агулам каля дзвюх тысяч чалавек змаглі сёння бясплатна атрымаць кампетэнтную дапамогу ў вырашэнні сваіх праблемных сітуацый.

У сферы шлюбна-сямейных адносін грамадзяне часцей за ўсё цікавіліся парадкам выезду непаўналетніх за мяжу Рэспублікі Беларусь, пасведчаннем Шлюбных дагавораў, здзелкамі з нерухомай маёмасцю, якая набываецца з выкарыстаннем сродкаў сямейнага капіталу, пагадненнямі аб дзецях.

Неабходна адзначыць, што бясплатныя кансультацыі па прававых пытаннях з'яўляюцца найважнейшым сацыяльным аспектам дзейнасці органаў, якія ўваходзяць у сістэму Мінюста, натарыята і адвакатуры. З іх дапамогай не толькі вырашаюцца праблемныя пытанні розных пластоў насельніцтва, але і рэалізуюцца задачы па прававой асвеце грамадзян.