У Лагойску адбылося адкрыццё новага будынка аддзела прымусовага выканання
Сёння Міністр юстыцыі Сяргей Хаменка прыняў удзел ва ўрачыстай цырымоніі адкрыцця новага адміністрацыйнага будынка аддзела прымусовага выканання ў Лагойску.
На мерапрыемстве таксама прысутнічалі намеснік міністра юстыцыі Сяргей Каліноўскі, намеснік старшыні Мінскага абласнога выканаўчага камітэта Дзяніс Курленка, старшыня Лагойскага раённага выканаўчага камітэта Аляксандр Ласевіч, начальнік галоўнага ўпраўлення юстыцыі Мінскага абласнога выканаўчага камітэта Аляксандр Бачыла і іншыя прадстаўнікі органаў улады.
У сваім прывітальным слове Сяргей Мікалаевіч адзначыў, што адкрыццё новага добраўпарадкаванага памяшкання аддзела прымусовага выканання Лагойскага раёна - пацвярджэнне клопату дзяржавы.
«Кожны павінен на сваім участку рабіць сваю працу. Гэта залог нашай будучыні, залог суверэнітэту нашай краіны. Задача судовага выканання - выкананне прынцыпу законнасці ў Рэспубліцы Беларусь. Вы спавядаеце гэты прынцып, дзейнічаючы на падставе судовых рашэнняў. Сістэма судовага выканання працуе на карысць эканомікі нашай краіны, а значыць, дзеля працвітання і будучыні Беларусі! А дзяржава ў сваю чаргу стварае дастойныя ўмовы для працы сваіх грамадзян. Сённяшняя падзея - гэта прыклад клопату выканаўчай улады, прыклад рэалізацыі прынцыпу "Усё для чалавека, усё ў імя чалавека!", - падкрэсліў Сяргей Хаменка.
Кіраўніка Міністэрства юстыцыі гасцінна сустракалі з хлебам-з соллю, а госць уручыў навасёлам сертыфікат на набыццё капіравальнай тэхнікі.
Пасля перадачы начальніку аддзела прымусовага выканання Лагойскага раёна Анастасіі Шылы сімвалічнага ключа ад будынка і пераразання чырвонай стужкі, госці змаглі азнаёміцца з умовамі размяшчэння супрацоўнікаў. У памяшканнях створаны камфортныя працоўныя месцы для выканання службовых абавязкаў, працы з насельніцтвам. Забяспечаны доступ судовых выканаўцаў да розных інфармацыйных банкаў даных іншых дзяржаўных органаў.
У завяршэнне рабочай паездкі Сяргей Мікалаевіч наведаў натарыяльную кантору Лагойскага раёна, юрыдычную кансультацыю Лагойскага раёна Мінскай абласной калегіі адвакатаў. Таксама міністр пабываў у мясцовым аддзеле загс.
